Нийслэлд энэ оны нэгдүгээр сарын 28-ны өдөр менингококкт халдварын тохиолдол гарсантай

холбогдуулан Налайх дүүргийн Голомт сургуулийн бага сургууль, 160 дугаар сургууль, 307 дугаар цэцэрлэгийн хичээл сургалтын үйл ажиллагааг цахим хэлбэрт шилжүүлсэн. Ойрын хавьтлуудыг тусгаарлан эрүүл мэндийн байгууллагын хяналтад авах, шинжилгээ авах, сургууль, цэцэрлэгүүдэд ариутгал, халдваргүйтгэл хийх зэрэг арга хэмжээг авч хэрэгжүүлсэн байна.

Нийслэлийн Баянгол дүүрэгт 2025 оны 1 дүгээр сарын 31-ний өдөр менингококкт халдварын сэжигтэй тохиолдол бүртгэгдсэн боловч лабораторийн шинжилгээгээр үгүйсгэгдсэн байна. Баянзүрх дүүрэгт тууралтат халдварын тохиолдол бүртгэгдсэн бөгөөд Халдварт өвчин судлалын үндэсний төвд хэвтүүлэн эмчилж байна. Тухайн цэцэрлэгт илэрсэн сэжигтэй тохиолдолтой нийлээд 9 хүүхэд байсан. Тэдгээр хүүхдүүдийг гэрээр нь тусгаарласан бөгөөд одоогоор эмнэлзүйн шинж тэмдэг байхгүй. Аль аль нь дээр нь шинжилгээний хариу эцэслэгдэж гараагүй байгаа. 

Сэжигтэй тохиолдлуудын хариу хоёрдугаар сарын 4, 6-нд гарна. 

Баянгол дүүрэгт бүртгэгдсэн хүүхэд хоёрдугаар сарын 18-наас хойш хичээлдээ яваагүй гэдэг мэдээллийг өгсөн.  Хүүхдүүдийн биеийн байдал одоогоор тогтвортой байгаа гэж ХӨСҮТ-өөс мэдээллээ. 

Менингококкт халдвар гэж юу вэ?

Менингококкт халдвар нь Neisseria meningitidis хэмээх нянгаар үүсгэгддэг, амьсгалын замаар халдварладаг хүнд хэлбэрийн бактерийн халдвар юм. Энэ нь менингит (тархины бүрхэвчийн үрэвсэл) болон септицеми (цусны халдвар) үүсгэж, богино хугацаанд амь насанд аюул учруулж болзошгүй өвчин юм.

Халдвар дамжих зам

• Халдвартай хүнээс агаар дуслын замаар (ханиах, найтаах, ойрын хавьтал байх үед)
• Гар, амны ойрын харилцаа (үнсэх, хоол, аяга, сав суулга хуваалцах)
• Цус, шингэнээр дамжин халдварлах нь ховор

Менингококкт халдварын шинж тэмдгүүд

Эхний шинж тэмдгүүд нь ханиад төстэй бөгөөд хурдан хүндэрдэг.

1. Менингит хэлбэрийн үед (тархины бүрхэвчийн үрэвсэл)

• Гэнэт өндөр халуурах (39-40°C)
• Хүзүү хөшиж, толгой хүчтэй өвдөх
• Дотор муухайрах, бөөлжих
• Гэрэлд мэдрэмтгий болох
• Ухаан санаа самуурах, таталт өгөх
• Жижиг тууралт гарч, ягаавтар өнгөтэй болох

2. Септицеми хэлбэрийн үед (цусны халдвар)

• Биеийн халуун ихсэх
• Арьсан дээр цусархаг тууралт гарах (биеийн аль ч хэсэгт, ялангуяа хөл, гар, хэвлий орчмоор)
• Гар, хөл хүйтэн болох
• Амьсгал давчдах
• Ухаан алдах, таталт өгөх

⏳ Эдгээр шинж тэмдэг илэрвэл нэн яаралтай эмнэлэгт хандах шаардлагатай!

Халдварын хүндрэл, аюул

Менингококкт халдвар маш хурдан хүндэрдэг бөгөөд эмчилгээ хийхгүй бол:

• 24-48 цагийн дотор амь насанд аюул учруулж болзошгүй
• Хүндэрсэн тохиолдолд – тархины хаван, бөөрний дутагдал, цус бүлэгнэх алдагдал (септицеми), эрхтэн гэмтэх, сонсголын алдагдал үүсгэж болно.
• Нас баралт өндөр – эмчилгээ хийлгээгүй тохиолдолд 50% хүрнэ. Харин эрт оношилж, антибиотик эмчилгээ хийвэл 90% нь эдгэрнэ.

Хамгийн их өртөмтгий бүлэг

• 5 хүртэлх насны хүүхдүүд
• Сул дархлаатай хүмүүс (тамхи татдаг, архаг өвчтэй, дархлаа дарангуйлагдсан)
• Оюутнууд, дотуур байр, цэргийн анги зэрэг олноороо хамт амьдардаг хүмүүс
• Түгээмэл бүс нутгаар аялж буй хүмүүс (Африк, Зүүн Өмнөд Ази)

Менингококкт халдвараас хэрхэн урьдчилан сэргийлэх вэ?

✔️ Вакцин хийлгэх – Энэ халдварт хамгийн үр дүнтэй хамгаалалт бол вакцин. Менингококкт халдварын эсрэг хэд хэдэн төрлийн вакцин байдаг.
✔️ Гар угаах, ариун цэврийг сахих – Бактери ойрын хавьталд халдварлах тул амны хаалт хэрэглэх, гарын ариун цэврийг сахих нь чухал.
✔️ Халдвартай хүнтэй ойрын харилцаанаас зайлсхийх – Өвчтэй хүнтэй нэг аяга, нэг хоол хэрэглэхгүй байх.
✔️ Дархлаагаа дэмжих – Сайн унтаж амрах, эрүүл хооллох, агаар салхинд гарах.
✔️ Сэжигтэй тохиолдолд яаралтай эмнэлэгт хандах – Хэрэв халууралт, тууралт, толгойн хүчтэй өвдөлт, хүзүүний хөшингө илэрвэл эмчид хандах хэрэгтэй.