"Эрдэнэс Тавантолгой" ХК дээр өнөөдрөөс эхлэн ирэх оны дөрөвдүгээр сарыг дуустал онцгой дэглэм тогтоож, Засгийн газрын Бүрэн Эрхт Төлөөлөгч томилохоор болжээ.

Энэ талаар ЗГХЭГ-ын дарга Д.Амарбаясгалан "Энэ хугацаанд олон улсын аудитын байгууллагын шалгалт оруулж, уулын болон санхүүгийн үйл ажиллагаанд бодитой дүгнэлт хийсний үндсэн дээр гүйцэтгэх удирдлагыг сонгон шалгаруулна.

Тус компанид анх 2022 оны аравдугаар сарын 26-нд онцгой дэглэм тогтоож, Сангийн Яамны Төрийн нарийн бичгийн дарга Ж.Ганбатыг зургаан сарын хугацаанд БЭТ-өөр томилон ажиллуулсан. Харин энэ хугацаа нь өндөрлөх үеэр дахин зургаан сараар сунгасан нь энэ оны аравдугаар сарын 26-нд дууссан юм. Холбогдох хуулийн дагуу нэг сарын хугацааны дараа дахин БЭТ томилж байна. 

"Эрдэнэс Тавантолгой" ХК-д онцгой дэглэм тогтоосноос хойш нэг жилийн хугацаанд тус байгууллага 3.3 тэрбум ам.долларын үнэлгээтэй 32.8 сая тонн нүүрс экспортолж, төсөвт 3 их наяд төгрөгийн татвар хураамжийг төвлөрүүлжээ. 

Онцгой дэглэм тогтоож, БЭТ ажиллах хугацааг сунгасан шалтгаан нь биржээр борлуулж байгааг тогтмолжуулах, засаглалын тогтвортой байдал, хараат бусаар ажиллах боломжийг бүрэн бүрдүүлэх юм" гэлээ.